កម្មវិធីបើកវគ្គបណ្តុះបណ្តាលចំណេះដឹងមូលដ្ឋានផ្នែកចក្ខុរោគ សម្រាប់វេជ្ជបណ្ឌិតទូទៅដែលមកពីមន្ទីរពេទ្យជាសម្ព័ន្ធមេត្រី

នាព្រឹកថ្ងៃចន្ទ ១៥កើត ខែមាឃ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២ ខែកុម្ភៈ ឆ្នាំ២០២៦ នៅមន្ទីរពេទ្យព្រះអង្គឌួង លោកសាស្ត្រាចារ្យរង លូ លីឃាង នាយកមន្ទីរពេទ្យព្រះអង្គឌួង បានអញ្ជើញចូលរួមបើកវគ្គបណ្តុះបណ្តាលចំណេះដឹងមូលដ្ឋានផ្នែកចក្ខុរោគ សម្រាប់វេជ្ជបណ្ឌិតទូទៅដែលមកពីមន្ទីរពេទ្យជាសម្ព័ន្ធមេត្រី ដើម្បីពង្រឹងគុណភាព និងពង្រីកសេវាថែទាំសុខភាពភ្នែក នៅតាមមន្ទីរពេទ្យបង្អែកខេត្ត និងស្រុកឱ្យកាន់តែប្រសើរឡើងបន្ថែមទៀត និងមានការគាំទ្រមូលនិធិដោយមូលនិធិ Fred Hollow កម្ពុជា។

សូមបញ្ជាក់ផងដែរថា វគ្គបណ្តុះបណ្តាលដែលមានរយៈពេល៣ខែនេះបង្កើតឡើងក្នុងគោលបំណង ដើម្បីពង្រឹងគុណភាព និងពង្រីកសេវាថែទាំសុខភាពភ្នែកនៅតាមមន្ទីរពេទ្យ បង្អែកខេត្ត-ស្រុក ជាពិសេសមន្ទីរពេទ្យដែលជាសម្ព័ន្ធមេត្រីរបស់មន្ទីរពេទ្យព្រះអង្គឌួង

ដោយផ្តោតសំខាន់លើការពិនិត្យ និងព្យាបាលជំងឺភ្នែកបឋម ក៏ដូចជាការសង្គ្រោះ និងបញ្ជូនទាន់ពេលវេលា ដែលរួមបញ្ចូលទាំងទ្រឹស្តី និងការអនុវត្តផ្ទាល់ទៅតាមកម្មវិធីសិក្សាស្នូលសម្រាប់បណ្តុះបណ្តាលគ្រូពេទ្យទូទៅផ្នែកចក្ខុរោគនៅមន្ទីរពេទ្យព្រះអង្គឌួង ក្នុងនោះមានសិក្ខាកាមចំនួន ១១រូប មកពីតាមបណ្តាខេត្ត រួមមាន ខេត្តកែប ១ នាក់ កំពត ៤ នាក់ តាកែវ ៥ នាក់ និងខេត្តកំពង់ចាម ១ នាក់៕