ផ្នែកជំងឺវះកាត់ទូទៅ

ផ្នែកជំងឺវះកាត់ទូទៅ (DEPARTMENT of GENERAL SURGERY)

ផ្នែកជំងឺវះកាត់ទូទៅនៃមន្ទីរពេទ្យព្រះអង្គឌួង គឺជាផ្នែកដ៏ធំ និងសំខាន់មួយ ដែលផ្តល់សេវាវះកាត់យ៉ាងទូលំទូលាយដល់អ្នកជំងឺជាច្រើនទូទាំងប្រទេសកម្ពុជា។ ផ្នែកនេះទទួលបន្ទុកទាំងការវះកាត់បន្ទាន់ និងការវះកាត់តាមកម្មវិធី ចាប់ពីវះកាត់តូចៗ ដល់វះកាត់ស្មុគស្មាញ និងប្រើប្រាស់បច្ចេកទេសទំនើប។

ផ្នែកនេះមានវេជ្ជបណ្ឌិតឯកទេសវះកាត់គ្រប់ជំនាញ គិលានុបដ្ឋាក-យិកា និងបុគ្គលិកបច្ចេកទេសដែលមានបទពិសោធន៍ និងទទួលបានការបណ្តុះបណ្តាលលើបច្ចេកទេសទាំងក្នុងនិងក្រៅប្រទេស។ ហើយក៏ជាកន្លែងបណ្តុះបណ្តាលសម្រាប់និស្សិតវេជ្ជសាស្ត្រ រួមមានវេជ្ជបណ្ឌិតឯកទេស វេជ្ជបណ្ឌិតទូទៅ និងគិលានុបដ្ឋាក-យិកា ដែលកំពុងបន្តសិក្សា ដើម្បីអភិវឌ្ឍធនធានមនុស្សផ្នែកសុខាភិបាលនៅកម្ពុជា។

ផ្នែកជំងឺវះកាត់ទូទៅក៏ធ្វើការសហការជាមួយវេជ្ជបណ្ឌិតជំនាញពីបណ្តាប្រទេសរីកចំរើននានា សំដៅអភិវឌ្ឍន៍សមត្ថភាពបច្ចេកទេសទំនើបៗដល់ក្រុមវេជ្ជបណ្ឌិតរបស់យើង ដើម្បីប្រសិទ្ធិភាពខ្ពស់ក្នុងការព្យាបាលជូនដល់ប្រជាពលរដ្ឋមកទទួលសេវាព្យាបាល។

ផ្នែកជំងឺវះកាត់ទូទៅ មាន៦យូនីត រួមមាន៖

១. យូនីត សោភ័ណសល្យសាស្ត្រ (Unit of Plastic and Reconstructive Surgery)

២. យូនីត សល្យសាស្ត្រប្រព័ន្ធប្រសាទ និង ឆ្អឹងខ្នង (Unit of Neuro-Surgery)

៣. យូនីត សល្យសាស្ត្រជំងឺឆ្អឹង និង បាក់បែក (Unit of Traumatology)

៤. យូនីត សល្យសាស្ត្រប្រព័ន្ធទឹកម៉ូត្រ (Unit of Urology)

៥. យូនីត សល្យសាស្ត្រប្រព័ន្ធរំលាយអាហារ (Unit of Digestive Surgery)

៦. យូនីត ព្យាបាលដោយចលនា (Unit of Physiotherapy)

រចនាសម្ព័ន្ធផ្នែក

ប្រធានផ្នែក

វេជ្ជបណ្ឌិតឯកទេស ហេង មុនីរត្ន

សញ្ញាបត្រឯកទេស សោភ័ណសល្យសាស្ត្រ – សាកលវិទ្យាល័យវិទ្យាសាស្ត្រសុខាភិបាល
វិញ្ញាបនបត្រ បញ្ជាក់ការសិក្សាបន្ដ ផ្នែកសោភ័ណសល្យសាស្ត្រ លើ ក ផ្ទៃមុខ និង ក្បាល ពីមន្ទីរពេទ្យសាកលវិទ្យាល័យ Soonchunhyang University Hospital Bucheon , ប្រទេសកូរ៉េខាងត្បូង

អនុប្រធានផ្នែក

វេជ្ជបណ្ឌិតឯកទេស ម៉ប់ សីហា

សញ្ញាបត្រឯកទេសវះកាត់ប្រព័ន្ធប្រសាទ – សាកលវិទ្យាល័យវិទ្យាសាស្រ្តសុខាភិបាល
សញ្ញាបត្រឯកទេសវះកាត់ប្រព័ន្ធប្រសាទ – សាកលវិទ្យាល័យ Paris Sorbonne, ប្រទេសបារាំង
Fellowship – Hôpital Femme Mère Enfant, Lyon, France

អនុប្រធានផ្នែក

វេជ្ជបណ្ឌិតឯកទេស អ៊ឹង ម៉េងលាង

• សញ្ញាបត្រឯកទេសសល្យសាស្រ្តប្រព័ន្ធទឹកម៉ូត្រ-សាកលវិទ្យាល័យវិទ្យាសាស្រ្តសុខាភិបាល

១. យូនីត សោភ័ណសល្យសាស្ត្រ (Unit of Plastic and Reconstructive Surgery)

ផ្នែកសោភ័ណសល្យសាស្រ្តនៃមន្ទីរពេទ្យព្រះអង្គឌួង ផ្តល់សេវាវះកាត់ឯកទេស ក្នុងការស្តារឡើងវិញ ដើម្បីកែលម្អ និងបង្កើនឬរក្សាមុខងារនៃរាងកាយ។ ក្នុងនាមជាផ្នែកមួយក្នុងចំណោមផ្នែកផ្សេងៗ នៃមន្ទីរពេទ្យថ្នាក់ជាតិ និងក្នុងនាមជាមជ្ឈមណ្ឌលបណ្តុះបណ្តាលវេជ្ជសាស្ត្រ យើងខ្ញុំបានខិតខំបញ្ចូលគ្នារវាង បច្ចេកវិទ្យាវះកាត់ទំនើប និងការអប់រំវេជ្ជសាស្ត្រ ដោយគោរពតាមស្តង់ដារវេជ្ចសាស្រ្តថ្នាក់ជាតិ និងអន្តរជាតិ ដើម្បីបម្រើប្រជាពលរដ្ឋទូទាំងប្រទេសកម្ពុជា។ មិនតែប៉ុណ្ណោះ យើងខ្ញុំបានធ្វើការសហការជាមួយផ្នែកពាក់ព័ន្ធផ្សេងៗ ដើម្បីធានាបាននូវការថែទាំពេញលេញចាប់ពីដំណាក់កាលពិនិត្យមុនវះកាត់ រហូតដល់ការថែទាំបន្ទាប់ពីវះកាត់។

សេវាកម្មសំខាន់ៗ៖

វះកាត់ស្តារឡើងវិញ Reconstructive Surgery:

ផ្នែកនេះផ្តល់នូវវិធីវះកាត់ស្តារឡើងវិញ ដើម្បីដោះស្រាយបញ្ហាដូចខាងក្រោម៖

ការខូចខាត បន្ទាប់ពីរបួស ឬការប៉ះទង្គិច ដែលពាក់ព័ន្ធនឹងជាលិកាតំបន់មុខក្បាល និងតំបន់មុខ-ថ្គាម
ការស្តារឡើងវិញ បន្ទាប់ពីការវះកាត់ ដុំសាច់មហារីក ឬមិនមែនមហារីក
ភាពខុសប្រក្រតីពីកំណើត រួមមាន បបូរមាត់ឆែប និងផ្ទៃមាត់ឆែប ព្រមទាំងភាពខូចទ្រង់ទ្រាយមុខក្បាលផ្សេងៗ
ការព្យាបាលរបួសស្មុគស្មាញ ការប្រទាញសាច់ដុំ (contracture) ការខូចទ្រង់ទ្រាយដោយស្នាមរបួស និងបញ្ហាផ្សេងៗទៀត

វះកាត់កែសម្ផស្ស (Aesthetic Surgery):

វិធីវះកាត់ត្រូវបានអនុវត្ត ដើម្បីកែលម្អរូបរាងខាងក្រៅ និងលើកកម្ពស់សុខុមាលភាពផ្លូវចិត្ត និងសង្គម រួមមាន៖

វះកាត់កែសម្ផស្សផ្ទៃមុខ (កែច្រមុះ កែត្របកភ្នែក និងវិធីបង្កើនភាពវ័យក្មេងនៃមុខ)
វះកាត់សុដន់ (បង្កើនទំហំ បន្ថយទំហំ លើកសុដន់ និងស្តារឡើងវិញ)
វះកាត់កែទម្រង់រាងកាយ (បូមខ្លាញ់ កាត់ស្បែកពោះយារធ្លាក់ និងវះកាត់បន្ទាប់ពីបាត់បង់ទម្ងន់)

ការគ្រប់គ្រង និងស្តារឡើងវិញរបួស (Burn Management and Reconstruction):

ការថែទាំរបួសស្រួចស្រាល និងការវះកាត់ព្យាបាលក្រោយរលាក
ការបន្សាំស្បែក និងស្តារឡើងវិញដោយប្រើការប៉ះសាច់ (Flap-based Reconstruction)
ការកែលម្អរស្នាមរបួសរយៈពេលវែង និងការស្ដារមុខងាររាងកាយ

វះកាត់ដៃ និងមីក្រូវះកាត់ (Hand Surgery and Microsurgery)

ការព្យាបាល របួសដៃ សរសៃពួរ និងសរសៃប្រសាទ
វះកាត់ស្តារឡើងវិញប្រើម៉ាស៊ីនមីក្រូស្កូបទំនើប រួមមានការផ្ទេរជាលីកាពីតំបន់ផ្សេងដែលឆ្ងាយពីតំបន់រងរបួស (Free Tissue Transfer)
ស្តារមុខងាររបស់អវៈយវៈខាងលើ

ផ្នែកនេះសហការយ៉ាងជិតស្និទ្ធជាមួយ៖

- ផ្នែកវះកាត់ទូទៅ (General Surgery)
- ផ្នែកវះកាត់បាក់បែកឆ្អឹង(Orthopedics)
- ផ្នែកជំងឺសើស្បែក (Dermatology)
- ផ្នែកត្រចៀក ច្រមុះ បំពងក និងផ្នែកវះកាត់ឆ្អឹងផ្ទៃមុខ (ENT and Maxillofacial)
- ផ្នែកចក្ខុរោគ (Ophthalmologist)
- ផ្នែកស្ដារលទ្ធភាពពលកម្ម និងចលនា (Rehabilitation and Physiotherapy) និងផ្នែកផ្សេងៗទៀត

រចនាសម្ព័ន្ធយូនីត

អនុប្រធានផ្នែក

វេជ្ជបណ្ឌិតឯកទេស ឡេង សុវណ្នរ៉ា (ប្រធានយូនីត)

សញ្ញាបត្រឯកទេស សោភ័ណសល្យសាស្ត្រ – សាកលវិទ្យាល័យវិទ្យាសាស្ត្រសុខាភិបាល
វិញ្ញាបនបត្របញ្ជាក់ការសិក្សាបន្ដផ្នែកសោភ័ណសល្យសាស្ត្រ លើផ្ទៃមុខ និង ឆ្អឹងថ្គាម នៅមន្ទីរពេទ្យសាកលវិទ្យាល័យ Caen ( CHU ), ប្រទេសបារាំង
វិញ្ញាបនបត្របញ្ជាក់ការសិក្សាបន្ដ លើផ្នែកសោភ័ណសល្យសាស្ត្រ នៅមន្ទីរពេទ្យ Seoul National University Bundang Hospital (SNUBH), ប្រទេសកូរ៉េខាងត្បូង
វិញ្ញាបនបត្រ បញ្ជាក់ការសិក្សាបន្ដ លើផ្នែកសោភ័ណសល្យសាស្ត្រ នៅមន្ទីរពេទ្យ ASAN Medical Center (AMC) ប្រទេសកូរ៉េខាងត្បូង

វេជ្ជបណ្ឌិតឯកទេស សឹង សុភា

សញ្ញាបត្រឯកទេស សោភ័ណសល្យសាស្រ្ត-សាកលវិទ្យាល័យវិទ្យាសាស្ត្រសុខាភិបាល
សញ្ញាបត្រឯកទេសវះកាត់មហារីក ក មុខ និង ក្បាល- សាកលវិទ្យាល័យ Strasbourg, ប្រទេសបារាំង

វេជ្ជបណ្ឌិត រ៉ុង រតន៍ម៉េរៀ

សញ្ញាបត្រឯកទេស សោភ័ណសល្យសាស្រ្ត-សាកលវិទ្យាល័យវិទ្យាសាស្ត្រសុខាភិបាល