សូមស្វាគមន៍មកកាន់ផ្នែកវះកាត់មុខ-មាត់ និងឆ្អឹងថ្គាម នឹងជំងឺមាត់ធ្មេញនៃមន្ទីរពេទ្យព្រះអង្គឌួង។ ផ្នែកនេះត្រូវបានបង្កើតឡើងក្នុងឆ្នាំ២០១៨ ក្នុងគោលបំណងផ្តល់ការថែទាំ និងព្យាបាលយ៉ាងទូលំទូលាយដល់អ្នកជំងឺដែលប៉ះពាល់ដល់សុខភាពមុខ-មាត់ ឆ្អឹងថ្គាម និងធ្មេញ។ ក្រុមការងារជំនាញៗរបស់យើងប្ដេជ្ញាផ្ដល់ការថែទាំ និងព្យាបាលដែលមានសុវត្ថិភាព ប្រសិទ្ធិភាព និងសមភាព ដោយផ្ដោតលើការថែទាំ ព្យាបាលលើអ្នកជំងឺ ចាប់ពីការព្យាបាលធ្មេញជាប្រចាំរហូតដល់ជំងឺស្មុគស្មាញនៃមុខ-មាត់ និងឆ្អឹងថ្គាម។ ផ្នែកនេះដំណើរការ ២៤/២៤ សម្រាប់សេវាមាត់-ធ្មេញបន្ទាន់ និងរបួសបាក់បែកឆ្អឹងមុខ ដោយធានាបាននូវការអន្តរាគមន៍ទាន់ពេលវេលា និងនិរន្តរភាពនៃការថែទាំ និងព្យាបាល។
ផ្តល់ការថែទាំព្យាបាលឯកទេស សម្រាប់របួសផ្ទៃមុខ ការបាក់បែកឆ្អឹងថ្គាម និងស្ថានភាព
ស្មុគស្មាញនៃការបែកបាក់ឆ្អឹងលលាដ៍ក្បាល និងឆ្អឹងមុខ។ ដោយផ្តោតលើការស្តារមុខងារទំពារ ទម្រង់ផ្ទៃមុខឱ្យប្រសើរឡើងវិញ ដោយប្រើបច្ចេកទេសវះកាត់ដែលមានមូលដ្ឋានវិទ្យាសាស្រ្តវេជ្ជសាស្រ្តទំនើប។
សេវាកម្មសំខាន់ៗ៖
- ការបាក់បែកឆ្អឹងមុខ (Le Fort I, II, III, ZMC, NOE fractures)
- ការបាក់បែកឆ្អឹងថ្គាម
- ការបាក់បែកធ្មេញ។
ផ្តល់ការថែទាំ-ព្យាបាលឯកទេស ចំពោះការវះកាត់ដុំសាច់ និងជំងឺឆ្អឹងថ្គាម។
សេវាកម្មសំខាន់ៗ៖
- ការវះកាត់ដកធ្មេញ ឬវះកាត់ថ្គាមទាល់
- ការវះកាត់ដុំសាច់ក្នុងឆ្អឹងថ្គាម និងដំបៅក្នុងមាត់
- ការវះកាត់ការបង្កមេរោគលើផ្ទៃមុខ និងមាត់ធ្មេញ
- ការវះកាត់ច្រិបសាច់ពិសោធន៍រករោគវិនិច្ឆ័យ។
ផ្តល់ការថែទាំ-ព្យាបាល ចំពោះដុំសាច់មហារីកដែលកើតមាននៅក្នុងមាត់ និងអណ្តាត។ ការធ្វើរោគវិនិច្ឆ័យ និងការព្យាបាល ការវះកាត់ដុំសាច់ក្នុងមាត់ និងថ្គាមនៅដំណាក់កាលដំបូង។ ការវះកាត់យកដុំសាច់មហារីក ដោយក្រុមគ្រូពេទ្យឯកទេស ដោយរក្សាមុខងារសរីរាង្គ និងទម្រង់ឱ្យបានល្អប្រសើរឡើងវិញ។
សេវាកម្មសំខាន់ៗ៖
- ការធ្វើរោគវិនិច្ឆ័យ និងការវះកាត់ច្រិបជាលិកាពិនិត្យ
- ការវះកាត់យកដុំសាច់មហារីក ក្នុងប្រអប់មាត់
- ការសាងសង់ឡើងវិញនូវពិការភាពមុខ-មាត់ និងឆ្អឹងថ្គាម
- ការសម្របសម្រួលជាមួយផ្នែកជំងឺមហារីក និងជំនាញពាក់ព័ន្ធផ្សេងៗ។
ផ្តល់ការប្រឹក្សា និងពិនិត្យលើការវាយតម្លៃ និងការព្យាបាលលើការស្តារមុខងារសន្លាក់ឡើងវិញ និងបំបាត់ការឈឺចាប់លើផ្ទៃមុខ និងសន្លាក់ឆ្អឹងថ្គាម។
សេវាកម្មសំខាន់ៗ៖
- ការពិនិត្យពិគ្រោះ និងការថតកាំរស្មីអ៊ិចលើសន្លាក់
- ការព្យាបាលដោយថ្នាំ ឬ ឧបករណ៍ពាក់ក្នុងមាត់ (Splint)
- ការវះកាត់ផ្លាស់ប្តូរសន្លាក់ឆ្អឹងថ្គាម។
